O alcalde de Vigo, Abel Caballero, proclamou este luns que Paula Prado “ten que deixar a secretaría xeral do PPdeG” polo seu “grave insulto” á cidade de Vigo, ao menosprezar a visita de Pedro Sánchez e o seu anuncio de que a planta de Stellantis contará con rede de moi alta tensión eléctrica.
Nun audio gravado e remitido aos medios, o rexedor olívico apuntou que Paula Prado manifestou que a visita de Sánchez (con motivo da convención política do PSdeG) foi “un insulto á intelixencia dos galegos” e mostrouse “absolutamente incrédulo” con esas declaracións do número 2 do PP galego.
Así, Abel Caballero censurou que Prado considere “irrelevante” e “sen importancia” a garantía do Goberno de España de que planta de Stellantis de Vigo terá esa subministración eléctrica. Que o presidente de España veña a dicir que a moi alta tensión está garantida é unha tomadura de pelo? Non, a tomadura de pelo foi cando Rajoy dixo que non, e Feijóo e o PP quedaron calados en lugar de defender a Vigo e a Stellantis”, afirmou o alcalde.
“Chámanos a atención que o PP nunca fala de temas de Vigo”, sinalou Caballero e lamentou que “sempre que hai medidas boas para Vigo a Xunta di que non hai que aplicalas”. “Así dixo Feijóo que non había que facer a autovía en túnel ao Porriño, así nos deixaron sen AVE a Madrid por Cerdedo, sen saída sur, e queríannos deixar sen Stellantis”, lamentou o rexedor olívico, quen proclamou que “Paula Prado ten que deixar a secretaría xeral do PP de Galicia por este grave insulto á cidade de Vigo”.
