A Policía Local de Vigo realizou case 2.400 intervencións de carácter humanitario en 2023, das cales 428 servizos consistiron en alertas debido a caídas accidentais no interior de vivendas.
Segundo explicou o corpo de seguridade, en numerosas ocasións son outros residentes do edificio os que dan aviso ás forzas da orde, debido a que non ven aos seus veciños pola zona ou mesmo escoitaron pedir axuda. Tamén outras veces son familiares os que dan a chamada de alerta, ao ser incapaces de levantar do chan a unha persoa.
“Os policías locais de Vigo prestan auxilio case diariamente a algunha persoa maior, converténdose en axentes humanitarios, enfrontándose frecuentemente a problemas que afectan os nosos maiores, tales como as mencionadas caídas, desorientación na vía pública ou situacións que pon en risco a súa vida ou integridade física, sen esquecer casos de demencia ou enfermidades neurodegenerativas”, engadiron.
Ademais de axudar a incorporarse ao accidentado, tamén proporcionan tranquilidade ao resto de persoas do fogar, tal como destaca a Policía Local. En caso de ser necesaria asistencia médica, solicitan servizos sanitarios.
“Os operativos con persoas de avanzada idade que viven soas multiplícanse cada ano na cidade olívica. Os Axentes atopáronse con anciáns que vivían en condicións infrahumanas, dando inmediatamente conta destas situacións aos servizos sociais do Concello de Vigo”, engadiu o corpo.
