O goberno municipal de Vigo saíu este martes ao paso das declaracións de veciños do centro e de membros dos servizos de Emerxencia, que alertaron da “falta de planificación” para previr a masificación e o colapso do tráfico, e asegurou que existe un plan de autoprotección e un plan de mobilidade para a campaña do Nadal, “coordinado e abordado” con Policía Local, Policía Nacional, bombeiros, e outros servizos de emerxencias.
Así o trasladou o portavoz do goberno vigués, Carlos López Font, nunhas declaracións gravadas e remitidas aos medios, nas que matizou que as persoas que compareceron xunto á asociación de veciños Zona Centro (un sarxento de bombeiros, o vicepresidente da Asociación Galega de Técnicos de Emerxencias Sanitarias e un membro do sindicato policial Jupol) “non representan a ninguén”. “É un movemento político de que quen perderon as eleccións e non soportan que á cidade lle vaia ben”, subliñou.
Segundo insistiu López Font, o Concello “cumpre escrupulosamente” todo o operativo de seguridade, “hai corredores de seguridade que funcionan”, e estase “resolvendo a cuestión (da gran afluencia de xente) satisfactoriamente”. “Fomos capaces de facer fronte á chegada de centos de miles de persoas coa profesionalidade de Policía Nacional e Local, bombeiros, voluntarios e ambulancias(…), en moitas cidades hai colas quilométricas en operacións de retorno masivo, aquí non, fomos capaces de reconducir aos visitantes”, proclamou o concelleiro socialista.
Por outra banda, o portavoz do goberno local lembrou que a única sentenza que existe sobre as denuncias por ruídos e molestias causados polos actos do Nadal é favorable ao Concello (aínda que foi recorrida polos veciños de Zona Centro e pola Fiscalía). Respecto diso, volveu a afirmar que, detrás desta asociación veciñal e das denuncias e queixas “están Rueda e o BNG, nunha acción contra Vigo sen precedentes”.
