Stellantis Vigo comezou a realizar na súa liña a preparación do motor eléctrico que equipan os novos Peugeot E-2008, que se monta no Sistema 1 da fábrica.

Tal como informou a compañía automobilística, estas operacións levan a cabo desde o pasado mes de outubro na nave S das súas instalacións de Balaídos, nunha zona específica que conta con 160 metros cadrados.

Ata agora, o motor eléctrico acabado procedía da planta de Stellantis de Tremety (Francia), que pasou a fornecer só a máquina eléctrica “espida”.

Por iso, o conxunto de pezas a montar (cargador, condensador de auga, tubos de refrixeración…) incorpóranse á máquina eléctrica nun circuíto en anel dotado dos elementos de manipulación necesarios.

Posteriormente, é trasladada á liña de motores do Sistema 1, onde se lle realizan operacións de acabado final xunto aos motores térmicos. Despois, todas as mecánicas chegan á liña de montaxe, para ser incorporadas á produción en serie.

A planta de Vigo produce o novo Peugeot 2008 cunha cadencia de 45 vehículos á hora e un potencial de 15 unidades á hora na versión 100% eléctrica. Esta última fabrícase en serie desde xullo, substituíndo á súa anterior xeración, lanzada en 2020.