A concesionaria de bus urbano de Vigo, Vitrasa, denunciou un novo ataque vandálico nun dos seus vehículos, sumando así tres en menos dunha semana, segundo lamentou a compañía. Foi o pasado venres, día 3 de novembro, sobre as 23,00 horas cando un autobús que cubría a liña 9B ao seu paso pola rúa da Rabadeira recibiu o impacto de pedra no parabrisas frontal. No vehículo viaxaba un pasaxeiro, que non sufriu danos, así como o condutor, que tamén salio ileso.

Este suceso súmase a dous altercados rexistrados días antes noutros autobuses urbanos, contra os cales tamén se lanzaron pedras, provocando a rotura dos seus cristais. “Insistimos en que este tipo de ataques pon en risco aos viaxeiros, aos compañeiros que realizan o servizo e a calquera persoa que circula pola vía”, indicou nun comunicado Vitrasa, tras meses de conflito laboral cos seus empregados, nos cales se levaron a cabo innumerables xornadas de paros parciais e folgas.