Unha muller de 33 anos de idade resultou ferida tras envorcar o seu vehículo na autovía A-55, á saída de Vigo en dirección Tui, nun accidente que provocou retencións á primeira hora deste martes. Segundo informou o CIAE 112 Galicia, varios particulares altertaron a Emerxencias sobre as 7,40 horas pola presenza dun coche envorcado no punto quilométrico 5 da autovía A-55, e sinalaban que non sabían se a persoa que ía no interior podería saír polos seus propios medios.
O 112 deu aviso a Urxencias Sanitarias-061, Garda Civil de Tráfico, bombeiros de Vigo, Policía Local e persoal de mantemento da vía. Finalmente, os profesionais sanitarios atenderon no punto a unha muller de 33 anos, que logo foi trasladada en ambulancia privada a un centro sanitario.
