O goberno municipal de Vigo reiterou este luns que a seguridade estaba “garantida” o pasado 11 de outubro, cando se rexistrou un incendio na rúa Alfonso X (no que morreron unha nai e tres dos seus fillos), e que “se podería atender un segundo incendio perfectamente”.
Así o trasladou o portavoz do goberno vigués, o concelleiro socialista Carlos López Font, en dúas das súas intervencións, relativas a senllas mocións presentadas polo BNG (sobre os problemas de infravivendas na cidade) e polo PP (sobre o ocorrido en Alfonso X e o déficit de persoal no servizo de bombeiros).
O grupo municipal do BNG presentou unha moción na que reclamaba a Concello e Xunta que exerzan as súas competencias para dar resposta ás persoas en situación vulnerable e ao problema das infravivendas, tras os casos de Alfonso X e da rúa Fisterra (onde se está tramitando o desaloxo forzoso de dous edificios polo risco derivado do mal estado do sistema eléctrico).
O portavoz nacionalista, Xabier Pérez Igrexas, denunciou a falta de acción do Concello e da Xunta, que “incumpren as súas propias promesas” relativas á creación de vivenda social, e tamén se referiu a as “mentiras” da concelleira de Seguridade, Patricia Rodríguez, tras o incendio mortal de Alfonso X, asegurando que descoñecía o número de bombeiros operativos ese día.
Pola súa banda, o concelleiro do PP, Miguel Martín, fixo fincapé tamén na situación do servizo de bombeiros, e acusou ao goberno local de rexeitar o convenio ofrecido pola Xunta para o reacollo dos afectados por ese sinistro.
“MOCIÓN DE OPORTUNISTAS”
En resposta aos grupos da oposición, o portavoz do goberno vigués, Carlos López Font, cualificou a proposta do BNG de “moción de oportunistas”, por “crear unha alarma infundada informando desde a mala fe”.
Tras criticar que a Xunta non exerceu as súas competencias en materia de vivenda nin de política social coas familias que vivían no edificio de Alfonso X, López Font recriminou ao portavoz nacionalista que preguntase “quen tería que morrer” se a noite dese incendio, o pasado 11 de outubro, chégase a producir un segundo sinistro na cidade. “Iso é propio de programas de TV pola tarde”, apuntou.
Segundo insistiu, ese día a seguridade en Vigo “estaba totalmente garantida” e recoñeceu que, aínda que se desprazaron a Alfonso X “todos os efectivos” de bombeiros, o incendio extinguiuse “en 3 minutos” e eses efectivos “poderían atender a outro incendio” no caso de que se producise. “E claro que a concelleira de Seguridade sabía cantos efectivos había”, engadiu, a pesar de que a propia Patricia Rodríguez, horas despois do sinistro e ao ser preguntada polo número de bombeiros dispoñibles, afirmou non coñecer ese dato.
Pola súa banda, Carmela Silva, que este luns presidiu o pleno municipal en ausencia do alcalde, pediu “reflexionar seriamente” ante unha traxedia da magnitude da ocorrida o 11 de outubro, que “impactou” aos cidadáns e aos concelleiros. Respecto diso, pediu non usar o ocorrido para “tentar danar” aos opoñentes políticos e traballar “xuntos” para que as entidades locais esixan os recursos necesarios para asumir competencias que lles son impropias.
A moción do BNG foi rexeitada, xa que só contou co tres votos favorables do grupo nacionalista, mentres que o PP abstívose, e o PSOE votou en contra.
CONCENTRACIÓN ‘DOS NINGUÉN’
Precisamente, e aproveitando a presentación desta moción do BNG, o colectivo ‘Os Ninguén’ concentrouse na mañá deste luns ás portas do Concello de Vigo para reclamar políticas públicas que garantan o acceso ás vivendas aos colectivos máis vulnerables.
Unha vintena de persoas participaron neste acto, no que reclamaron vivendas públicas en réxime de aluguer social, e no que, simbólicamente, designaron o ascensor HALO (que ten un custo de máis de 15 millóns de euros) “monumento á frivolidade e o malgasto”.
MOCIÓN DO PP
Por outra banda, o grupo municipal do PP presentou unha moción sobre a “falta de prevención” do goberno local ante as emerxencias, e polo “abandono” do servizo de bombeiros. Así, o concelleiro Miguel Martín cuestionou por que non se desaloxou o edificio de Alfonso X se había constancia de problemas coa subministración eléctrica, tal e como se fixo na rúa Fisterra.
Martín volveu a esixir unha “comisión de investigación municipal” sobre o incendio que custou a vida a unha nai e tres dos seus fillos, se é que o goberno local “non ten nada que ocultar”, e preguntou “desde cando” sabían os responsables municipais que ese edificio estaba “okupado”.
López Font respondeu ao PP reiterando as súas críticas polo “uso oportunista” da traxedia de Alfonso X, e volveu a repetir que a seguridade da cidade “estaba garantida”. Así mesmo, con respecto ao servizo de bombeiros, asegurou que as Ofertas Públicas de Emprego “están executadas” e que o persoal do servizo alcanza “o 90 % do persoal teórico”, o que é “totalmente suficiente” para cubrir as necesidades da cidade.
Ante a petición de reprobación da concelleira de Seguridade, o edil socialista lembrou que “a verdadeira reprobación dana as urnas” e que os cidadáns outorgaron ao PSOE o 70 % dos representantes do pleno, fronte ao 18 % que lle deron ao PP. “Detesto a súa forma de facer política”, sentenciou.
O portavoz do BNG, Xabier Pérez Igrexas, tachou de “repugnante” e “indecente” a utilización que o PP fai “dunha situación tráxica” para “coar o seu discurso reaccionario sobre a okupación”, tratando de usalo como “cortina de fume” para ocultar a “responsabilidade” da Xunta, que non ofreceu alternativa habitacional ás persoas que vivían no inmoble incendiado, a pesar de coñecer a súa situación vulnerable desde hai dous anos, cando varias delas, con menores a cargo, foron desaloxadas dun poboado chabolista en Navia.
A moción do PP tamén foi rexeitada. Neste caso, os ‘populares’ votaron a favor, mentres que PSOE e BNG votaron en contra.
