O Global Ranking of Academic Subjects 2023, que clasifica ás universidades en base a 55 materias de investigación e que é elaborado por Xangai Ranking Consultancy, sitúa á Universidade de Vigo no posto 15 do mundo en Ciencia e Tecnoloxía dos Alimentos.
Esta clasificación baséase en diferentes indicadores e datos que miden o desempeño dunhas 5.000 universidades en todo o mundo (das que unhas 1.900 figuran no ranking) en ámbitos relevantes, incluídos premios internacionais, logros científicos, calidade da investigación e colaboración internacional.
Así, no ámbito de Ciencia e Tecnoloxía dos Alimentos, a institución académica viguesa sitúase como 15ª do mundo, superando a posición do ano pasado, cando estivo no tramo de postos do 51 ao 75. Deste xeito, convértese na primeira universidade española e a segunda europea nesta lista.
Por outra banda, na materia de Oceanografía, a UVigo mantense entre as 200 mellores, e mellora a súa posición en Ciencias Agrícolas e en Farmacia e Ciencias Farmacéuticas (entre as 300 mellores). Tamén mellorou a súa posición nos ámbitos de Ciencias Atmosféricas e Biotecnoloxía, e mantén a súa posición entre as 500 mellores na área de Ecoloxía.
A vicerreitora de Investigación, Transferencia e Innovación da UVigo, Belén Rubio, trasladou a “gran satisfacción” por estes resultados, e destacou que a posición en Ciencia e Tecnoloxía dos Alimentos pon á universidade viguesa “entre as máis punteiras do mundo”.
Isto, unido ao recoñecemento no ámbito de Ciencias Agrícolas, “confirma o adecuado traballo e carácter de excelencia” do Instituto de Agroecoloxía e Alimentación (IAA), situado no campus de Ourense. Do mesmo xeito, destacou tamén o bo traballo doutros centros de investigación, de áreas como as que saen nese ranking, como o Centro de Investigacións Mariñas (CIM), o Centro de Investigación en Nanomateriais e Biomedicina (CINBIO), ou o Centro de Investigación en Tecnoloxías, Enerxía e Procesos Industriais (Cintecx).
