A Federación Olívica de Anpas (Foanpas) denunciou este xoves o “abandono” do Concello de Vigo, que “un ano máis” resolve con atraso a concesión das bolsas municipais de comedor, e constatou que, máis dun mes despois de iniciarse o curso, as familias “aínda non saben” se terán esa axuda.

Nunha rolda de prensa, a presidenta de Foanpas, Iria Salvande, sinalou que “resulta pousado” que este atraso se produza “cada ano” e iso a pesar do “compromiso” do goberno local de que non ocorrería este curso. Así, segundo explicou, a día de hoxe as familias “están bastante angustiadas”.

A situación derivou en que moitos dos solicitantes optasen por non enviar aos seus fillos ao comedor, porque é “inasumible” o custo mensual (uns 85 euros por alumno), especialmente se teñen máis dun fillo. Ademais, incidiu Salvande, para as Anpas tampouco é viable adiantar o diñeiro. Para Foanpas este problema “non é por unha cuestión de diñeiro”, senón de “deixamento” da administración municipal á hora de tramitar as solicitudes. “Saben dabondo que o curso empeza en setembro”, aseverou a presidenta da Federación.

A RESPOSTA DO GOBERNO DE VIGO QUE SE LEMBRA DO BNG

O Concello de Vigo saíu ao paso das críticas da Federación Olívica de Anpas, Foanpas, polo atraso na resolución da convocatoria de bolsas de comedor e, lembrou que, cando gobernaba o BNG en Vigo (entre 1999 e 2003) había “unha longa lista de espera” para recibir bolsas de comedor e “moitos nenos” quedaban sen a axuda.

Nunhas declaracións remitidas aos medios, o portavoz do goberno local, Carlos López Font, subliñou que Foanpas “recibe máis de 600.000 euros para dedicar a bolsas de comedor”. O edil socialista, que non desmentiu o atraso na resolución da convocatoria, explicou que as familias en situación vulnerable poden recorrer ás axudas de emerxencia que dá o Concello “ata que se resolva a convocatoria”. Respecto diso, asegurou que “os nenos máis vulnerables están a comer nos comedores escolares”.