Os representantes dos traballadores na mesa negociadora do convenio da empresa Borgwarner Emissions System Spain (auxiliar de automoción situada na parroquia viguesa de Zamáns) anunciaron a convocatoria de folga indefinida a partir do 9 de outubro ante o bloqueo nas negociacións.
Así se acordou na asemblea celebrada o pasado venres, como medida de presión para desbloquear esa negociación colectiva. Así mesmo, a parte social confirmou que haberá outros “actos reivindicativos” nos próximos días.
Segundo denunciaron, despois de 40 reunións, as pretensións da empresa “buscan empeorar as condicións socioeconómicas” do persoal, e iso a pesar de que a planta de Vigo atravesa uns “momentos de bonanza” e de “gran carga de traballo”, o que levou á empresa a abrir unha nova planta no Porriño.
Ademais, lembraron que hai unhas semanas Borgwarner informou da compra dunha parcela no parque empresarial de Porto do Muelle de Nigrán, para a construción dun novo centro de traballo “con subvencións públicas”.
Ante todas esas “boas noticias” e “bos resultados económicos e, sobre todo beneficios”, os traballadores “non poden entender que a dirección siga propondo perdas de poder adquisitivo na negociación do convenio colectivo”. Por iso, tras constatar “o pouco interese da dirección” para chegar a un acordo, avanzaron esta convocatoria de folga.
