Familiares da galega desaparecida no barco do Consello Superior de Investigacións Científicas (CSIC) criticaron este martes o “silencio” do organismo e manifestaron o seu desexo de que se “depuren responsabilidades”.
Así o sinalou o portavoz da familia, o avogado Diego Leis, nun escrito remitido aos medios de comunicación, onde informou de que este martes a Garda Civil entregará as dilixencias do caso ao Xulgado de Denia. A familia espera que isto arroxe “luz” ao asunto, porque máis dunha semana despois da desaparición “nin se atopou á muller nin se sabe que sucedeu no barco, nin ninguén asumiu ningún tipo de responsabilidade”.
“É rechamante o silencio do CSIC, que non deu ningunha explicación sobre o sucedido, nin sobre os medios que puxo para protexer a María del Carmen”, engade Leis no documento. Por isto, a familia manifestou que vai seguir na vía xudicial “ata o final”, para conseguir saber que pasou no barco e para que se “depuren responsabilidades de quen tiñan que pór medios para evitalo”.
Todo iso despois de que a muller, camareira no barco, desaparecese do buque o pasado sábado 9 de setembro, polo que a principal hipótese apunta a que se tirou ao mar de forma voluntaria. Salvamento Marítimo recibiu sobre as 08,20 horas do domingo o aviso de que faltaba unha tripulante no buque oceanográfico García do Cid.
