O alcalde de Vigo, Abel Caballero, advertiu este luns de que o Concello non admitirá a instalación de ‘food trucks’ na cidade, en alusión ao ‘village’ que Xunta, Porto e Deputación instalarán nas Avenidas con motivo dunha quíntupla escala de cruceiros, e engadiu que “hai que ir a establecementos hostaleiros” da cidade.
Así o trasladou nunha gravación remitida aos medios, e en alusión á chegada, este martes, de cinco cruceiros á terminal olívica, cuns 15.000 turistas e tripulantes a bordo. Para recibir aos cruceristas, Xunta, Deputación de Pontevedra e o propio Porto prepararon diferentes actividades de lecer, carpas de promoción turística e de oferta gastronómica (con dúas ‘food trucks’ da campaña Galicia sabe AMAR, da Consellería de Pesca, para degustación gratuíta de produtos das rías galegas).
O alcalde da cidade advertiu: “Non queremos ‘food trucks'”, e proclamou que os turistas deben visitar os establecementos hostaleiros de Vigo, “que están todo o ano e pagan os seus impostos na cidade”. “Os ‘food truck’ non forman parte do que este Concello está disposto a permitir”, sentenciou.
Con todo, non é a primeira vez que, tanto na zona portuaria, como noutras zonas da cidade, con motivo de diversos eventos, instaláronse ‘food trucks’. Exemplo diso foron os postos móbiles de comida en citas como o festival O Marisquiño ou o Vigo SeaFest de ARVI, ademais doutros postos de comida como os que cada Nadal se instalan no mercadillo Cíes Market da Praza de Compostela.
CONXEMAR
Por outra banda, tras manter unha reunión cos responsables de Conxemar, o alcalde tamén se referiu a este evento, que se celebrará os primeiros días de outubro. Abel Caballero eloxiou a capacidade de organización e avanzou que Policía Local e Garda Civil colaborarán na xestión do tráfico na contorna do Ifevi os días que se celebre a feira.
Así mesmo, instou á Xunta a que “empece a preparar” unha nova ampliación do recinto feiral, e criticou a “neglixencia” do goberno galego porque “non é capaz de ampliar o Ifevi para que Conxemar siga a súa senda de crecemento”.
O Instituto Feiral de Vigo foi ampliado en 2018, cun investimento da Xunta de algo máis de 4 millóns de euros. A seguinte ampliación completouse en maio de 2022 e foi entregada en setembro, cun investimento de máis de 8 millóns de euros, de maneira que, actualmente, o recinto conta cunha superficie expositiva duns 38.000 metros cadrados.
