O Porto de Vigo acolle o terceiro curso de formación de inspectores de pesca liderado pola Organización das Nacionais Unidas para a Alimentación e a Agricultura (FAO) co obxectivo de frear a pesca ilegal non declarada e non reglamentada.
Precisamente este luns levouse a cabo a inauguración desta iniciativa, na que participarán durante tres semanas 16 inspectores de Costa Rica, Cuba, Ecuador, Perú, Honduras, México, Uruguai e Panamá, que coñecerán da man de expertos internacionais e dos equipos da Xunta e da Secretaría Xeral de Pesca ferramentas e prácticas que poderán aplicar nos seus países.
Tal como indicou o presidente da Autoridade Portuaria de Vigo, Carlos Botana, a pesca ilegal supón unha “ferida” para a biodiversidade dos océanos e o porto olívico é “referente” na loita contra esta actividade non declarada.
Así, a FAO creou dous centros de formación a nivel global para inspectores, estando un en Corea do Sur e outro precisamente en Vigo.
Botana puxo en valor a importancia do curso “para compartir toda a experiencia e aprender dos demais” xa que “só se se traballa unido, en todos os niveis de control e inspección, desde a orixe ao destino dos produtos, serase capaz de contribuír a un océano sustentable”.
Na inauguración do curso tamén estivo o conselleiro de Mar, Alfonso Villares, que reivindicou o papel de Galicia como “referente europeo e internacional” na loita contra a pesca ilegal.
El volveu a criticar o documental de National Geographic que tachaba a Vigo como o maior porto de entrada de pesca ilegal de Europa. O conselleiro puxo en valor o traballo levado a cabo en Galicia para impedir estas prácticas.
Alicia Mosteiro, a oficial de Pesca responsable da formación en FAO, dixo que o curso é unha oportunidade para “afianzar coñecementos” e para compartir prácticas desenvolvidas noutros países.
O xefe de Inspección da Secretaría Xeral de Pesca, David Poderoso, destacou a importancia de ter unha visión “holística” da pesca ilegal, á cal se deben sumar todos os estados que teñen costa para así impedir que esta mercadoría se descargue noutros países.
