O alcalde de Vigo, Abel Caballero, celebrou este venres que a Xunta de Galicia dese luz verde á declaración de impacto ambiental do novo Plan Xeral de Ordenación Municipal (PXOM) e prometeu “a máxima prema” por parte do Concello, xa que “urxe moito” contar co novo plan.
O rexedor, en declaracións remitidas aos medios, matizou que o informe favorable ao expediente de avaliación ambiental “chega tarde” e supuxo un “atraso de 13 meses” no traballo municipal. En todo caso, afirmou que “agora importa mirar cara a adiante” e declarouse “moi satisfeito”.
Así, explicou que os técnicos do Consistorio están agora analizando o informe, que inclúe requirimentos que deben ser tidos en conta. A partir de aí, é necesario un informe do secretario municipal no que se recollan os pasos administrativos necesarios para a aprobación provisional da PXOM, sinalou.
“É momento de estudo, de elaboración do calendario, pero iremos coa máxima prema”, prometeu Abel Caballero, que recoñeceu que “ten que ser canto antes, porque urxe moito”. Respecto diso, subliñou que “é importantísimo” que Vigo dispoña dun novo plan, que permitirá “espazos dotacionais, espazos públicos, zonas verdes e vivendas para que a xente con menos recursos poida ter a súa vivenda en aluguer ou propiedade”.
Segundo lembrou, o PXOM de 2008 foi anulado polo Tribunal Supremo precisamente por non dispor de avaliación ambiental, xa que a Xunta (gobernada polo bipartito PSdeG-BNG) considerou no seu momento que podía ser eximido. Agora, o novo Plan conta con este informe “feito, valorado e aprobado”.
