Axentes da Policía Local de Vigo detiveron a un home e unha muller, que son parella, por agredirse mutuamente no transcurso dunha discusión nun domicilio do Casco Vello.

Segundo informaron fontes policiais, os feitos ocorreron sobre as 10,00 horas deste martes, cando o 092 recibiu un aviso de que se estaba producindo unha forte discusión de parella nunha vivenda de cálea Cruz Verde.

Ao chegar a dotación ao lugar, puido escoitar os berros desde a rúa e os axentes subiron rapidamente ao piso. Ao chamar á porta, tanto o home como a muller comunicaron que non tiñan intención de abrir, pero tras insistir varios minutos, os policías conseguiron que o home abrise.

O home, D.P.G., de 30 anos de idade, presentaba un hematoma no ollo esquerdo e arañazos no pescozo. Segundo explicou, tras unha acalorada discusión, fora agredido pola súa parella, que lle deu unha puñada no ollo e rabuñoulle, aínda que negou que el lle atacou a ela.

Pola súa banda, a muller, E.R.A., de 25 anos de idade, recoñeceu que discutira co home e que habían forcexeado, caéndose ao chan, motivo polo que se lesionou un nocello. Así mesmo, asegurou que as lesións do home debíanse a esa caída fortuíta. Finalmente, os axentes procederon á detención de ambos, por un suposto delito de violencia no ámbito familiar.