A planta do grupo Stellantis en Vigo volverá parar parte da súa produción nas próximas horas por problemas de aprovisionamento, segundo trasladou a dirección ao persoal.

Así, a empresa ha conunicado aos traballadores que, unha vez máis, “por causa de forza maior”, queda suspendida a actividade do sistema 2 (o que monta as furgonetas), na quenda de noite deste mércores. Tamén se suspende a actividade nas quendas de mañá e tarde deste xoves no sistema 2; así como a xornada do sábado 2 de setembro.

A factoría viguesa retomou a súa actividade o pasado 21 de agosto tras o período vacacional e, 24 horas despois, os problemas de subministracións obrigaron a parar a produción en tres quendas do sistema 2.