Un mozo foi rescatado polo helicóptero Pesca-I ao quedar atrapado nun muro nas Illas Cíes, segundo informa o 112 no seu parte de incidencias.

O home resultou ferido nas pernas e foi necesaria a intervención do helicóptero de Gardacostas de Galicia para rescatalo. Posteriormente, foi trasladado na aeronave ao Hospital Álvaro Cunqueiro.

Os feitos sucederon no Faro do Peito, uns minutos despois das 19.00 horas do xoves. Foi nese momento cando o 112 Galicia recibiu a alerta da situación do mozo a través de Urxencias Sanitarias de Galicia-061.

A partir de aí, desde o 112 Galicia púxose a situación en coñecemento de Salvamento Marítimo, do Servizo de Gardacostas de Galicia, da Policía Local e de Protección Civil de Vigo.