Unha menor tivo que ser evacuada a un centro hospitalario tras ser rescatada da auga da praia da Punta, en Vigo, na tarde deste domingo.

Tal como informou o 112 Galicia, os feitos ocorreron sobre as 18.30 horas, cando un particular solicitou asistencia sanitaria para a moza, á que sacaran da auga neste areal vigués situado na parroquia de Teis.

Na chamada, o alertante explicaba que a menor non respondía aos intentos de interactuar con ela, tras afogarse na praia.

Foi un socorrista o que atendeu á menor ata a chegada do persoal de urxencias sanitarias, que a evacuou ao Hospital Álvaro Cunqueiro nunha ambulancia medicalizada.

No operativo tamén interviñeron os axentes da Policía Local.