A ONG Amnistía Internacional, Asociación Yaran, Asociación Diversidades, Mans Unidas, Rede Social Galicia-Sur, Rede Acolle, Sindicato de Traballadoras do Fogar e Coidados (SinTraHoCu) e SOS Racismo Vigo organizan este martes unha concentración na cidade olívica polo primeiro aniversario dos máis de 30 inmigrantes falecidos no salto ao valo de Melilla.
Con motivo do Día Internacional das Persoas Refuxiadas, que se celebra este martes 20 de xuño, a ONG manifestaranse a partir das 19,30 horas na Praza do Emigrante de Vigo para pedir explicacións e unha investigación sobre o que ocorreu en Melilla o pasado 24 de xuño de 2022, cando morreron polo menos unhas 37 persoas e desapareceron unhas 77.
Baixo a lema ‘Un ano de impunidade: Melilla nunca máis‘, a ONG representarán con varias siluetas ás persoas falecidas. Ademais, colocaranse zapatos e obxectos simbólicos da viaxe co que pretendían chegar a Europa.
“O 24 de xuño pasado as forzas de seguridade de Marrocos e España cometeron crimes de dereito internacional con cariz racista no intento de impedir a entrada en Melilla de preto de 2.000 persoas, a maioría orixinarias de Sudán”, declarou a portavoz de Amnistía Internacional en Vigo, Mariana Jorge Lozano.
Nun comunicado, as ONG’s lamentaron que os axentes utilizaron porras, gas lacrimóxeno e balas de goma, dándolle golpes e patadas aos inmigrantes nun recinto pechado do que non podían escapar facilmente, “mesmo despois de que estivesen baixo control policial e non puidesen moverse”.
