Galicia será o epicentro do debate europeo sobre o mar coa ‘Conferencia EurOCEAN’, que se celebrará en Vigo nos días 10 e 11 de outubro.
Segundo informou este venres a Consellería do Mar a través dun comunicado, o evento será celebrado no Auditorio Mar e reunirá a comunidade científica, responsables políticos e administracións de todos os niveis, así como representantes da industria e da sociedade para debater sobre os retos e oportunidades no ámbito do mar.
A ‘Conferencia EurOCEAN’ é o principal foro de encontro a nivel europeo sobre política e ciencia mariña. Reúne á comunidade científica e todas as partes interesadas coas persoas responsables polas políticas dos Estados Membros da UE para “considerar, discutir e contestar os novos desenvolvementos, desafíos e oportunidades en ciencia e tecnoloxía mariña”.
Ademais, o evento, que celebra a súa décima edición e intégrase a Axenda da Presidencia española da Unión Europea, busca reforzar a colaboración entre a Misión da UE para a restauración do océano e das augas continentais ata 2030.
A conferencia deste ano ten como lema ‘One Ocean, One Voice’ (un océano, unha voz) e ten como obxectivo acordar mensaxes craves para a comunidade científica internacional sobre “a necesidade de restaurar e salvagardar o bo estado do océano para as xeracións futuras” e “a sustentabilidade dos servizos que prestan os ecosistemas mariños mediante o fomento da investigación”, segundo sinalou a Consellería do Mar.
