Abanca activou unha liña de crédito dotada con 325 millóns de euros, ampliable ata 375, para atraer proxectos de investimento co obxectivo de “reforzar a competitividade das principais áreas industriais de Vigo e a súa área de influencia”.
O banco reedita así un plan de financiamento “que se compromete directamente coa viabilidade e o crecemento dalgúns dos principais focos de emprego e riqueza da provincia”, segundo destaca a través dun comunicado.
A entidade financeira escenificou este apoio cun acto na súa sede na cidade olívica. O director territorial de Abanca en Vigo, Walter Álvarez, foi o encargado de debullar as novidades desta proposta aos representantes das distintas áreas empresariais e destacou “a vocación do banco de consolidarse como socio financeiro de referencia para as empresas galegas”.
En representación das áreas empresariais participaron no encontro David Regades, delegado da Zona Franca de Vigo (promotora das áreas de Balaídos, zona comercial de Bouzas, parque tecnolóxico e loxístico de Vigo, Porto do Peirao en Nigrán e do polígono industrial A Granxa); Indalecio Cuevas, presidente da Entidade Urbanística de Conservación A Granxa; Santiago Gómara, presidente da Asociación de Empresarios das Gándaras-Porriño; Manuel Castro, presidente da Asociación de Empresarios de Mos; Jesús González, presidente da Asociación Empresarial Areas – Tui; Juan Carlos Lemos, presidente da Asociación de Propietarios e Empresarios do Polígono Chan da Ponte – Salvaterra; Javier Díaz, presidente da Asociación de Empresarios A Pasaxe, e Roberto Cavallo, presidente Entidade para a Conservación do PTL de Vigo.
OFERTA FINANCEIRA
O plan de financiamento de Abanca está deseñado para “satisfacer integralmente” as necesidades das empresas situadas nestas áreas industriais.
Cun enfoque “adaptado”, permite realizar investimentos e “fortalecer a competitividade dos proxectos”. Neste sentido, as empresas poderán acceder a financiamento “flexible”, con “amplos” prazos de amortización e intereses “moi competitivos”, segundo Abanca, a través de préstamos, leasing e distintas alternativas de financiamento oficial.
A oferta inclúe tamén solucións pensadas para as necesidades “máis inmediatas”, para así poder adecuarse “ás demandas da actividade diaria”. O colectivo terá á súa disposición produtos como pólizas de crédito, anticipos, liñas de desconto comercial e avais. Ademais, a entidade reserva un espazo á internacionalización grazas ás liñas de comercio exterior.
OPORTUNIDADES DE FORMACIÓN COA UIE
Os representantes das distintas áreas empresariais aproveitaron o encontro para subscribir un protocolo de colaboración formativa coa Universidade Intercontinental da Empresa (UIE).
Cristina Liao, responsable de Programas in-Company e Consultoría da UIE, foi a encargada de presentar as distintas opcións que ofrece a entidade académica.
Con este novo acordo, as empresas poderán beneficiarse de descontos “exclusivos” en estudos de grao e posgrao, así como acceder a programas de formación “adaptados ás súas necesidades”.
CÍRCULO
Por outra banda, Círculo de Empresarios de Galicia e Abanca renovaron este xoves o seu convenio de colaboración, que posibilitará, un ano máis (ata o 30 de xuño de 2024), a organización de actividades de distinta índole.
O acordo foi subscrito por José Lino Comesaña, director de Banca Institucional Galicia, España Norte e Portugal de Abanca; e por Manuel Rodríguez, presidente do Círculo de Empresarios de Galicia.
Ambos coincidiron en resaltar o interese deste convenio, por canto propiciará o intercambio de experiencias, a análise da situación socioeconómica e de novas tendencias e as relacións interempresariales.
