Varios centenares de persoas –unhas 300-400, segundo a organización– manifestáronse este domingo polas rúas de Vigo convocados polo sindicato CIG para demandar un incremento salarial no sector da alimentación da provincia de Pontevedra

Tras manter sete reunións coa patronal, os traballadores denuncian o seu “inmobilismo” para abordar a subida salarial nas negociacións do convenio. O martes volverán sentar a negociar e, de non haber acordo, a secretaria nacional de CIG-Servizos, Transi Fernández, xa avanzou que irán á folga o vindeiro venres 23 de xuño, previa da festividade de San Juan e día dunha elevada cantidade de vendas no sector.

Segundo detallou Transi Fernández a Europa Press, entre as demandas dos traballadores do sector estarían varios pluses, así como a redución de xornada laboral de 40 a 35 horas semanais e un incremento salarial do 7%, xa que a media dos salarios rolda os 1.090 euros ao mes. “Entendemos que este sector se merece algo máis que o que ofrecen, que é nada”, lamentou Fernández.

Ademais, a representante sindical sinalou que na provincia de Lugo a patronal si ofreceu un incremento salarial. Neste caso, a proposta dos empresarios é dun aumento do 4%. Unha cantidade que consideran insuficiente, polo que irán á folga na provincia de Lugo tamén o próximo 23 de xuño.