A Universidade de Vigo (UVigo) celebrou este venres un acto homenaxe a todos os docentes que ao longo de 2022 obtiveron praza como catedráticos e titulares. En total, o ano pasado 39 profesores fixéronse coa praza de catedráticos (25 homes e 14 mulleres), mentres que 75 conseguiron situarse como docentes titulares (42 homes e 33 mulleres).
Para eles, a Universidade organizou un acto no paraninfo do edificio Ernestina Otero como un “pequeno agarimo para quen é un bo exemplo da vitalidade da institución, a calidade que teñen os profesores e o ben que fan o seu traballo durante moito tempo”, segundo indicou o reitor, Manuel Reigosa.
A apertura do evento correu a cargo da vicerreitora de Profesorado e Ordenación Académica, Patricia Valcárcel, quen mostrou o seu orgullo “por ver como o traballo ben feito de todas as persoas que forman parte desta comunidade dá os seus froitos”.
A continuación, a secretaria xeral, María José Bravo, foi a encargada de ir chamando individualmente aos profesores para asinar a toma de posesión e, posteriormente, recoller a insignia de mans do reitor.
“É un día de celebración, individual para cada un de vós, pero tamén de celebración para toda a Universidade”, reivindicou Reigosa, que aproveitou a ocasión para pedirlles que non decaian nos seus esforzos.
