As intensas choivas da tarde do xoves deixaron na cidade de Vigo medio centenar de incidencias, segundo informou a Policía Local, con baixos e garaxes alagados, árbores caídas e outros contratempos que, no entanto, non causaron danos persoais.

Así, fontes policiais informaron de máis de 50 servizos nun curto espazo de tempo en varios puntos do termo municipal. Os axentes do 092, en colaboración con outros servizos de emerxencias, tiveron que actuar para a retirada de árbores e ramas caídas, para achicar auga en baixos e garaxes, e para atender problemas de circulación nalgunhas rúas.

Segundo explicaron, as precipitacións provocaron acumulación de auga e que saltasen as tapas de rexistro nalgúns viarios, que tiveron que ser cortados ao tráfico. Con todo, insistiron, “non houbo que lamentar danos persoais”.