A factoría viguesa do grupo automobilístico Stellantis contratará a unhas 700 persoas para recuperar unha quenda de fin de semana a partir de setembro.

Desta maneira, a compañía recuperará case dous anos despois esta quenda, despois de que se suspendese a consecuencia das alteracións nos fluxos de aprovisionamento que impedían naquel momento manter os volumes de produción.

Segundo confirmou este luns a dirección da compañía ao comité de empresa, a cuarta quenda do Sistema 2 (onde se ensamblan as furgonetas das distintas marcas do grupo) de Stellantis Vigo porase en marcha o 16 de setembro.

O novo equipo permitirá dar resposta aos volumes de produción previstos e contratar a 700 persoas tras a paralización desta quenda o 21 de outubro de 2021.