Nais e pais de Vigo pediron este venres unha mellora da calidade da comida dos comedores escolares ante diferentes problemas que denunciaron nos últimos anos en relación co “mal funcionamento” dos servizos de catering dos mesmos.
En comunicado remitido aos medios de comunicación, a Asociación de Nais e Pais de Alumnos do colexio Emilia Pardo Bazán ‘Chouzo’ criticou que levan anos presentado escritos ás autoridades competentes expondo os problemas detectados, como alimentos en mal estado, pratos con pouca cantidade de comida, fríos ou menús pouco variados e desequilibrados nutricionalmente.
“Os nenos tamén manifestan constantemente o seu descontento pola calidade da comida, que con frecuencia é insípida e pouco apetitosa. A pesar de todas as queixas presentadas, non só non se teñen constatado melloras significativas na calidade da comida, senón que ademais sempre se obtén o silencio por resposta”, lamentaron.
A pesar de que os novos pregos do proceso de contratación dos catering para os próximos dous anos si recolle unha “subida considerable” do prezo do menú, no resto dos aspectos “apenas hai avances”. “Tememos que todo vaia a seguir igual”, lamentaron, indicando que, ao seu xuízo, o problema é de xestión.
Neste sentido, celebraron que en Nigrán o próximo curso si poderán utilizar unha cociña propia nun centro na que o catering está obrigado a elaborar os seus menús, pero preguntáronse por que iso non pode ocorrer noutros centros.
