O comité de empresa do servizo de cociña do tres hospitais públicos de Vigo (Álvaro Cunqueiro, Meixoeiro e Nicolás Pena) anunciou a convocatoria dunha folga indefinida a partir do próximo xoves, día 18 de maio, co obxectivo de reclamar o mantemento de todos os postos de traballo ante a posibilidade de que se produzan despedimentos co cambio de concesión.

Foi o mes pasado cando os traballadores iniciaron un calendario de mobilizacións que continuou este pasado mércores cunha concentración diante do Hospital Álvaro Cunqueiro, despois de que a concesionaria recoñecese que serían necesarios entre 10 e 14 despedimentos nas cociñas para que fose rendible o servizo.

Tras a convocatoria de folga, o Servizo Galego de Saúde (Sergas) citou ao comité de folga a unha reunión para determinar os servizos mínimos, onde o ente público presentou unha proposta do 100% do cadro do persoal “polo que é imposible realizar a folga, vulnerando así un exercicio fundamental e constitucional“.

Na reunión, a CIG trasladou que o paro só se desconvocará se se garante por escrito que non vai haber despedimentos por parte da concesionaria e da empresa Arcasa, que xestiona o servizo de cociña.