Un transeúnte localizou este mércores o cadáver dun veciño de Vigo, José Miguel Fernández Roldán, de 55 anos de idade, cuxa desaparición foi denunciada na Comisaría da cidade, despois de que a súa familia e achegados lle perderan a pista o pasado 29 de abril.

Segundo confirmaron fontes policiais, o achado produciuse nun escampado da rúa Vista ao Mar, na parroquia de Teis, e a súa identidade xa foi confirmada. O corpo foi trasladado a dependencias do Imelga para a realización da autopsia, e as mesmas fontes optaron por non expresar ningunha hipótese sobre as circunstancias do falecemento ou sobre se o corpo tiña signos de violencia, á espera de que se realicen os estudos pertinentes.

Tras a denuncia pola súa desaparición, a asociación SOS Desaparecidos emitiu unha alerta coa descrición deste vigués. Entre as características que achegaba, sinalaba que se trataba dunha “persoa vulnerable”.