Un home foi detido en Vigo tras ser sorprendido o pasado venres, día 21 de abril, cando propinaba patadas a unha muller na avenida de Emilio Martínez Garrido da cidade olívica.

Diso informou este mércores a Vicepresidencia Segunda da Xunta e Consellería de Presidencia, Xustiza e Deportes, que detalla que os axentes realizaban unha patrulla cando observaron os feitos e acudiron en socorro da vítima.

Os efectivos procederon de inmediato á protección da muller, impedindo que continúe a agresión, e procederon á detención do agresor.

O atacante foi trasladado á comisaría da Policía Nacional de Vigo, onde se tramitaron as dilixencias pertinentes por un suposto delito violencia de xénero.

Ata o momento, a policía autonómica ten asignada a protección de 292 vítimas de violencia de xénero nas diferentes xefaturas de unidade.