A agrupación socialista de Vigo instou ao presidente da Xunta e presidente do PPdeG, Alfonso Rueda, a aclarar se “lle está gardando o sitio” na presidencia do Porto á candidata ‘popular’ á Alcaldía, Marta Fernández-Tapias, en previsión duns malos resultados electorais o próximo 28 de maio, e advertiu de que, se é así, a candidatura do PP é unha “farsa”.
En declaracións remitidas aos medios, o secretario xeral do PSOE vigués e portavoz do goberno municipal, Carlos López Font, trasladou a súa “preocupación polo que está a ocorrer no PP de Vigo en relación co porto”, que cualificou como “auténtico escándalo”.
Así, denunciou que o Partido Popular “está a gardar o sitio, gardando a presidencia do porto de Vigo á candidata do PP ás eleccións municipais” e advertiu disto é “unha farsa moi grave”, porque “están a enganar á xente”.
“Rueda sabe que a candidata do PP é feble politicamente e que vai obter un mal resultado, por iso estalle buscando sitio, e debe dicilo xa”, proclamou López Font, quen afirmou que o Porto é “moi importante” para Vigo e “non pode converterse nunha mercadoría, nun retiro”.
“Rueda como presidente do PP, pero tamén como presidente da Xunta, debe dicirllo xa aos vigueses. Se está a gardar a presidencia do Porto á candidata, porque se é así, a candidatura é unha completa farsa”, sentenciou.
