Axentes da Policía Nacional da Comisaría de Vigo e da Policía Xudicial de Madrid detiveron a 5 persoas, membros dun grupo itinerante dedicado á comisión de roubos con forza en establecementos comerciais, e aos que vinculan cun roubo cometido, polo método do butrón, nunha xoiaría da cidade olívica.

A investigación iniciouse o pasado mes de xaneiro, tras un roubo nunha xoiaría de Vigo, onde os ladróns accederon a través dun butrón, e levaron xoias e reloxos valorados en máis de 80.000 euros. Ademais, un dos sospeitosos do roubo estaba vinculado a un roubo con forza cometido en novembro pasado en Madrid, onde se apoderou de efectos e diñeiro por un total duns 3.000 euros.

Segundo informaron fontes policiais, as pescudas permitiron localizar aos presuntos autores e detelos en diferentes localidades de Madrid e Toledo a finais de marzo, desarticulando así unha organización criminal de carácter itinerante, especializada en roubos en establecementos comerciais.

No marco das actuacións, bautizadas como ‘Operación Topo’, realizáronse varios rexistros domiciliarios, nos que se interviñeron ferramentas susceptibles de ser utilizadas na comisión dos roubos, ademais de varios teléfonos móbiles.

A Policía tamén se incautou dun vehículo, utilizado para os desprazamentos deste grupo criminal, e que xa estaba a ser desmontado por pezas para evitar que fose relacionado cos roubos e eludir así a acción dos investigadores.

Os detidos caracterízanse pola súa mobilidade xeográfica e pola súa destreza no manexo de ferramentas e técnicas específicas para a apertura de portas e caixas fortes. Ademais, adoptaban numerosas medidas de seguridade para entorpecer a investigación policial.

Con estas detencións, a Policía dá por esclarecido o asalto á xoiaría de vigo, ademais do roubo con forza cometido nun establecemento comercial de Madrid en novembro do ano pasado. Con todo, as xestións continúan e non se descarta que se poidan atribuír outros delitos aos sospeitosos.