Abel Caballero acusa á Xunta dunha “campaña antiVigo” por multala pola antiga EDAR de Coruxo

O rexedor lembra que o parque de bombeiros de Coruxo é "provisional" e afirma que a APLU "non ten razón".

Por

E.P.

4 Abril, 2023

Arquivo - Bombeiros de Vigo nunha protesta ante as instalacións da antiga EDAR de Coruxo que, afirman, non cumpren os requisitos para albergar un parque, aínda que sexa provisional, para este servizo.. EUROPA PRESS - Arquivo — Bombeiros de Vigo nunha protesta ante as instalacións da antiga EDAR de Coruxo que, afirman, non cumpren os requisitos para albergar un parque, aínda que sexa provisional, para este servizo.. EUROPA PRESS - Arquivo

O alcalde de Vigo, Abel Caballero, atribuíu a sanción imposta pola Axencia de Protección da Legalidade Urbanística (APLU) ao Concello pola construción dun parque de bombeiros provisional nas instalacións da antiga EDAR de Coruxo a unha “campaña antiVigo” da Xunta de Galicia.

Preguntado polos medios acerca desa sanción e das decisións que adoptará o goberno municipal (tendo en conta de que, ademais da multa de case 28.000 euros, a APLU ordena pechar o parque e repor ao seu estado orixinal as instalacións), o alcalde limitouse a sinalar que “se seguirá atendendo moi ben a seguridade da cidade”.

“Supoño que a APLU non quere que quedemos sen bombeiros, supondo que a APLU teña razón, que non a ten”, proclamou o rexedor olívico. Segundo Abel Caballero, o expediente sancionador do organismo de protección da legalidade urbanística responde a unha “campaña antiVigo” da Xunta. “Isto é política, porque é unha instalación provisional. É política antiVigo da Xunta, que está nunha campaña contra a cidade”, sentenciou.