Un total de 36 proxectos chegaron ao Startup Day de ViaGalicia na sede viguesa da Zona Franca, que hoxe deu o pistoletazo de saída da sétima edición desta aceleradora de empresas cunha xornada de traballo no Centro de Negocios de Porto do Molle, en Nigrán (Pontevedra).

Tras un primeiro encontro en Lugo o pasado luns, este mércores o delegado do Estado, David Regades, deu a benvida aos participantes. “ViaGalicia, que naceu da man do Consorcio como ViaVigo, cumpre dez anos de éxito na súa actividade, cun total de 78 proxectos innovadores de emprendemento apoiados, que crearon uns 550 empregos“, reivindicou Regades.

Dos 36 proxectos da sede de Vigo, un total de 19 son da cidade olívica, mentres que tres son de Nigrán; dous, de Ourense; dous, da Coruña, e un no caso dos municipios de Pontevedra, O Porriño, Muros, Madrid, Gondomar, Tui, Sanxenxo, A Estrada, Salvaterra e Derio (Biscaia). Todos eles súmanse aos 20 proxectos que iniciaron o seu traballo na sede de Lugo. En total 56 pasaron o primeiro corte, de máis de 140 iniciativas presentadas.