O vicepresidente primeiro da Xunta e conselleiro de Economía, industria e Innovación, Francisco Conde, participou este mércores en Baiona no acto de conmemoración do 150 aniversario de Augas de Mondariz, empresa da que destacou o seu esforzo por “marcar a diferenza” e a súa contribución á expansión da marca Galicia Calidade.

Conde tamén puxo en valor a importancia da compañía no desenvolvemento económico e social da contorna no que está situada. Segundo recolle o Goberno galego nun comunicado, o vicepresidente quixo enxalzar o sector das augas mineiro medicinais da Comunidade, que fai posible que existan máis de 20 balnearios que dan emprego a 1.200 persoas e facturan 60 millóns de euros ao ano.

Tamén destacou as 10 plantas embotelladoras galegas cunha facturación de 120 millóns e 300 empregados con presenza en máis de 50 países do mundo. En concreto, Francisco Conde felicitou a Augas de Mondariz pola súa traxectoria e a súa aposta pola “innovación, diferenciación, sustentabilidade e internacionalización”.