A sección sindical da CIG en Vitrasa, a concesionaria do transporte urbano do Concello de Vigo, celebrou este luns que a compañía confirmase que procederá a contratar de forma indefinida a 20 novos condutores tras unha denuncia ante Inspección de Traballo.
Segundo informou a organización sindical nun comunicado, foi a CIG quen denunciou o ano pasado o “exceso de xornada” na compañía, cifrando nunhas 50.000 horas as que o conxunto do persoal facía a maiores cada ano, sumando horas extraordinarias e descansos traballados.
A finais de 2022 a autoridade laboral emitiu unha resolución na que lle requiría á compañía a contratación de novo persoal para evitar estes “excesos”, polo que agora levarán a cabo ditas contratacións.
Por iso, a CIG trasladou a súa satisfacción e destacou a “felicidade” que supón o feito de que “20 novas familias vaian ter un emprego para poder gañarse a vida nestas circunstancias tan duras de subida de prezos e de encarecemento da enerxía e dos combustibles”.
