O xulgado do Contencioso Administrativo número 2 de Vigo ditou sentenza na que revoga o acordo de Xunta de Goberno local da cidade, polo que se aprobou en xullo de 2022 o plan de formación dos empregados municipais, anulando devandito plan.

Así, tras un recurso interposto por CC.OO., o xuíz declara contrario a dereito o acordo do goberno vigués, ao non aprobarse o plan de formación seguindo as canles previstas, constituíndo unha comisión paritaria e dando voz aos sindicatos na elaboración do documento.

Segundo lembra o maxistrado, o plan de formación de 2020 xa foi anulado por el mesmo, e polos mesmos motivos. No caso do plan de 2022, apunta que o acordo de Xunta de Goberno “incorre nos mesmos vicios” que o de 2020, polo que “o ‘efecto útil’ da anterior sentenza (…) foi máis ben escaso”.

O xuíz sinala que existe un acordo regulador no Concello de Vigo, que prevé a existencia dunha comisión paritaria que, entre as súas funcións, ten a elaboración do plan de formación. Con todo, apunta, que o goberno local preferiu que fosen os técnicos quen o elaborasen, unilateralmente, sen contar cos representantes do persoal.

PLAN DE FORMACIÓN DO 2020

Dáse a circunstancia de que, en 2021, o mesmo xulgado anulou o plan de formación de 2020, nunha sentenza na que recolle que a previsión de crear unha comisión paritaria “nunca se cumpriu” e “xa é hora de que se cumpra”, instando o Concello a “abandonar escusas”.