O sindicato policial CEP de Pontevedra solicitou a través das súas redes sociais pistolas táser para as ocasións nas que haxa que “neutralizar” a agresores, ao fío da publicación este sábado dun vídeo no que se ve unha pelexa entre dous transportistas no porto de Vigo.

O sindicato cualifica as imaxes de “moi violentas”. “Unha patrulla de policía con que os reduce? Nin unha soa táser en Vigo nin policías suficientes para tanta violencia”, alertan no comunicado, no que denuncian ademais discriminación.

Aínda que un operario portuario acudiu para mediar, os transportistas enfrontáronse cun martelo e cunha barra de ferro, ademais de propinarse golpes xa corpo a corpo. Unha testemuña do ocorrido gravou a pelexa e subiuna a ‘Social Drive’, foro para avisos de tráfico.