A portavoz nacional do BNG, Ana Pontón, subliñou este xoves que Vigo “merece máis que unha confrontación inútil e partidista”, que lle fai perder “oportunidades”, e chamou aos vigueses a apostar, o próximo 28 de maio, polo proxecto de futuro que ofrece a formación nacionalista, co candidato Xabier Pérez Igrexas á fronte.

Segundo subliñou Pontón, a cidade “necesita máis que nunca ao BNG” e sempre que o Bloque foi decisivo no goberno local “a cidade avanzou”. “O BNG foi a única alternativa política no últimos catro anos cun traballo que combinou a crítica con propostas, alternativas e solucións”, recalcou, no acto de presentación do primeiro tramo da candidatura viguesa, que tivo lugar no Auditorio Mar de Vigo.

Respecto diso, defendeu o proxecto dos nacionalistas, centrado en construír “unha cidade para as persoas”, con mellores servizos públicos, máis sustentable e con máis xustiza social. Tamén apostou por fortalecer o tecido económico e industrial para xerar riqueza e emprego, para que Vigo recupere o seu papel como “motor” de Galicia e sexa referente en sectores estratéxicos como o naval, a pesca e a automoción.

Ana Pontón, tras asegurar que “outro Vigo e outra Galicia son posibles”, trasladou a súa confianza en que o 28 de maio o BNG será “a forza que máis suba”, multiplicando o seu número de concelleiros e alcaldes e alcaldesas. “Afianzando así o cambio galego, avanzado no reto de darlle a Galicia, por primeira vez na súa historia, un goberno e unha presidenta coas mans libres para defender os intereses de Galicia”, sentenciou.

CANDIDATO Á ALCALDÍA

Pola súa banda, o candidato á Alcaldía, Xabier Pérez Igrexas, subliñou que o 28 de maio dáse a oportunidade de sacurdirse “a inercia paralizante” do actual goberno local, e avanzar cara a unha cidade “máis habitable e máis verde, igualitaria e socialmente xusta“.

Así mesmo, puxo en valor o equipo que lle acompañará nestes comicios, unha candidatura “potente e ambiciosa”, plural, con perfís diversos e renovada, “con vigueses e viguesas comprometidos, xente honesta, traballadora, que ama á cidade e ao país”.

Ademais da cabeza lista, completan os primeiros postos da candidatura do BNG en Vigo o número 2, Ana Martínez, traballadora da Universidade de Vigo e responsable de Cultura do BNG da cidade; no posto 3 estará Filipe Abalde, adestrador e preparador físico, vinculado tamén ao mundo audiovisual; no posto 4 estará a avogada Elsa Quintas, activista de ‘Queremos Galego’; e no posto 5, estará Brais Ruanova, que foi responsable comarcal de Galiza Nova e traballador do sector agroquímico.

O dez primeiros postos da candidatura complétanse coa deputada autonómica Carmela González; o responsable comarcal do BNG, Manuel Caride; a activista social Olaia Chaves; a independente Aclamación Vaqueiro, docente e exdirector do Arquivo Pacheco; e a enfermeira Pilar Rodríguez, secretaria comarcal de CIG-Saúde.