A presidenta da Deputación de Pontevedra e presidenta do PSdeG, Carmela Silva, trasladou este martes o seu convencemento de que o PP non será capaz de recuperar as alcaldías de Redondela, Ponteareas ou Baiona nas eleccións municipais do próximo 28 de maio, porque os seus candidatos foron “obrigados” a encabezar as listas.

Así o trasladou, en resposta a preguntas dos medios sobre os resultados dos comicios neses municipios. Segundo sinalou, no caso de Baiona, Vázquez Almuíña aceptou a candidatura “de mala gana”, e os baioneses “son moi listos”. “Como van querer un alcalde que non quere ser alcalde?”, insistiu.

En Ponteareas, onde os ‘populares’ apostaron pola directora de Turismo de Galicia, Nava Castro (que xa foi alcaldesa desa localidade entre 2000 e 2003), tampouco lograrán gobernar, segundo Carmela Silva. De feito, recalcou que Castro non quería deixar as súas obrigacións na Xunta e tivo que aceptar ser candidata, e engadiu: “Creo que Rueda nunca quixo que Nava Castro estivese en Turismo de Galicia, e aproveitou as eleccións municipais”.

Con respecto a Redondela, a dirixente socialista tamén lembrou que o candidato do PP, Javier Bas (alcalde entre 2011 e 2019), “abandonou a política” tras os últimos comicios locais, e volve porque “llo impoñen”. Nese caso, recalcou que “non hai comparación” coa xestión que está a levar a cabo a actual alcaldesa redondelana, a socialista Digna Rivas.

ELECCIÓNS PARA AS DEPUTACIÓNS

Por outra banda, e tamén a preguntas dos xornalistas, Carmela Silva referiuse ao sistema de constitución das deputacións e á designación dos membros destas institucións.

Segundo apuntou, “todas as eleccións deberían ser directas”, porque serían “máis democráticas” e, por tanto, os deputados provinciais deberían ser elixidos tamén pola cidadanía, e non designados polo peso das formacións políticas en cada partido xudicial. “Espero que máis pronto que tarde se poida facer esa modificación”, aseverou.