A compañía viguesa Teatro Ensalle estreará este venres a peza ‘Sen a soga ao pescozo’, realizada en colaboración co creador escénico e actor Gonzalo Cunill, a partir dunha serie de textos escritos polo propio Cunill durante os primeiros meses da pandemia.

Esta proposta contou para a súa produción co apoio económico da Xunta de Galicia, que tamén coopera economicamente coa programación do Teatro Ensalle e co seu novo sistema de iluminación.

O director da Axencia Galega dás Industrias Culturais (Agadic), Jacobo Sutil, participou este mércores na presentación do espectáculo e explicou que a contribución á compañía durante 2022 por parte da Consellería de Cultura foi dun total de 110.000 euros a través de tres convocatorias de axudas.

Jacobo Sutil eloxiou o “traballo vangardista e innovador” de Teatro Ensalle, tanto na faceta de produción como na de espazo programador. Tamén destacou a actividade que leva a cabo desde Vigo para compañías e colectivos de toda Galicia, como sede de residencias creativas de propostas de teatro e danza, así como a proxección dos seus espectáculos fóra da Comunidade.

‘Sen a soga ao pescozo’ parte do libro do mesmo título do creador arxentino Gonzalo Cunill, publicado pola editorial Aflera. Trátase dun conxunto de textos escritos durante 2020, a modo de apuntamentos nun diario.

Convertida en peza dramática, pon en escena un discurso a tres voces, interno e profundo, pero non exento de humor, e unha sucesión de accións próximas á ‘performance’. O propio Cunill dirixe a peza con Pedro Fresneda, e pona en escena xunto a Raquel Hernández e Artús Rei.