A sección sexta da Audiencia Provincial de Pontevedra confirmou unha sentenza de primeira instancia que obriga a unha empresa a indemnizar en 10.000 euros a un vigués por ceder os seus datos aos ficheiros de solvencia patrimonial de dúas firmas por unha suposta débeda que non existía.

O prexudicado, representado por Unive Avogados, soubo que estaba neses ficheiros cando lle foron denegadas varias operacións de crédito, entre elas, o financiamento dun teléfono móbil. Por iso, interpuxo unha demanda e o xulgado de Primeira Instancia número 8 de Vigo deulle a razón.

Así, estableceu que debía ser indemnizado en 10.000 euros porque se vulnerou o seu dereito á honra xa que, ademais dos problemas que tivo para acceder a crédito, os seus datos como suposto moroso foron consultados máis de 15 veces por unha decena de entidades. Ademais, foi incluído neses ficheiros por unha débeda que foi xerada por unha contratación fraudulenta realizada por outra persoa.

A empresa presentou recurso de apelación pero a Audiencia desestimouna e ratificou a sentenza de instancia e a indemnización establecida.