O BNG de Vigo presentou este venres as bases do seu programa electoral de face aos comicios municipais de maio, e puxo sobre a mesa unha proposta “aberta” para que os cidadáns fagan as súas achegas.

O concelleiro nacionalista e candidato, Xabier Pérez Iglesias, presentou os principais eixos do seu programa, para leva a “Vigo máis aló”, recuperando o seu papel como “pulmón industrial” de Galicia, a súa potencia cultural, e convertendo a cidade nunha urbe “habitable, verde e igualitaria”.

Pérez Iglesias destacou que, en pouco máis de tres meses, os vigueses poderán co seu voto “trazar un novo rumbo” e acabar coa “inercia paralizante” e a “política frívola” do actual goberno local, que “pretende reducir Vigo a un parque temático”.

Así, apostou por ofrecer solucións ao “grave” problema de vivenda, chamou a “democratizar o espazo público”, ou a “revolucionar a mobilidade”, con medidas para protexer aos colectivos vulnerables, para crear oportunidades que freen o éxodo de mozos, plans de reactivación económica, de impulso ao pequeno e mediano comercio, ou medidas de turismo “sustentable” fronte á “turistificación masiva”.

O candidato nacionalista tamén fixo fincapé na necesidade de acabar coa “desertización cultural” da cidade, de avanzar na “efectiva” normalización lingüística do galego e de pór fin á “permanente pelexa partidista que empequeñece a cidade”, aínda que esixindo á Xunta e ao Goberno central que desistan do “abandono” a Vigo.

O BNG abriu un espazo na súa web (https://vigo.bng.gal/articulo/novas/28m-eleccions-municipais-2023/20230216133951005901.html) para recoller as achegas dos cidadáns, e unha campaña en redes sociais co ‘hashtag’ #IdeasVigo.

“Queremos elaborar o noso programa do mesmo xeito que defendemos que se debe gobernar a cidade: escoitando e dialogando de maneira permanente”, concluíu o edil nacionalista, que recalcou que tende “a man” aos vigueses “que saben e, sobre todo, que senten que Vigo merece máis”.