A reforma integral da biblioteca municipal de Mos, na que a Xunta colabora cunha achega de 250.000 euros, estará terminada en abril, segundo confirmou o conselleiro de Cultura, Educación, FP e Universidades, Román Rodríguez, nunha visita a este municipio.

O proxecto de reforma prevé, entre outras accións, habilitar novos espazos infantís, tecnolóxicos e audiovisuais, e a achega da Xunta enmárcase no compromiso de modernizar estas infraestruturas culturais de proximidade.

Segundo lembrou o conselleiro, esta é unha das liñas de actuación do novo Plan Xeración Cultura, a folla de ruta de 2023 para “acompañar a expansión do sector cultural”, cunha batería de medio centenar de medidas, e cun investimento global de 34 millóns de euros.

Este plan ten como obxectivo fundamental o acceso á cultura de todas as persoas e en todos os lugares, e Román Rodríguez puxo en valor o “avance significativo” que supón para os veciños de Mos contar cunha biblioteca municipal modernizada, a nova biblioteca María Magdalena.

Neste centro, incluirase unha zona infantil de lectura, unha sala de estudo, e áreas de informática. Tamén se dotará de novo mobiliario con materiais ergonómicos e adaptados, mellorarase a iluminación e instalarase un sistema de proxección audiovisual para presentacións e exposicións.