A Garda Civil detivo o pasado 31 de xaneiro a un home, de 49 anos de idade e veciño de Cerdedo-Cotobade, como presunto autor de varios roubos en igrexas da provincia de Pontevedra.

Tal como informou a Benemérita nun comunicado, tres dos roubos foron cometidos en ‘petos de ánimas’, que son pequenos santuarios situados en camiños e que constitúen materiais de culto e devoción.

Outro feito realizouno na Igrexa de Antas, na Lama, e tratou tamén de acceder á igrexa de Corredoira, en Cerdedo-Cotobade.

Tras varias semanas de investigación, entrevistando a testemuñas e sacerdotes das parroquias, identificouse o autor, que foi detido a finais de xaneiro e pasou a disposición do Xulgado de Garda de Pontevedra.