Un home, C.C.T. de Vigo e 34 anos de idade, foi detido o pasado luns na cidade olívica tras agredir á súa esposa en plena rúa, dándolle varias puñadas e tirándoa ao chan.
Tal como informou a Policía Local, os feitos ocorreron sobre as 16,40 horas, cando un veciño alertou de que na rúa Coruña un home estaba a pegar a unha moza. Unha vez no lugar, os axentes non localizaron aos aludidos, pero posteriormente escoitaron uns berros na rúa Arquitecto José Barbón.
Alí, as testemuñas manifestaron observar como o home propinara varias puñadas no ombreiro e no rostro á muller, de 21 anos, que trataba de recoller unha maleta que levaba, empuxándoa ao agacharse.
Pola súa banda, o home indicou que era a súa esposa e que discutiran debido a que, ao seu xuízo, ela era “moi celosa”. No momento que foi informado de que ía ser detido, comezou a mostrar unha actitude agresiva, ofrecendo unha forte resistencia activa ao labor dos funcionarios, tratando mesmo de agredilos.
A moza actuou nos mesmos termos, tratando de entorpecer e dificultar a detención do home, polo que tamén foi reducida e inmobilizada. Finalmente, foi detido pola presunta comisión dun delito de violencia de xénero.
Ademais, tras un cacheo superficial, incautáronse catro desaparafusadores, catro cogollos de marihuana e unha navalla, tramitándoselle á súa vez a correspondente proposta de sanción administrativa por portar eses elementos.
