Unha muller tivo que ser rescatada este sábado despois de sufrir unha caída no seu domicilio, situado na rúa de Pizarro, en Vigo.
Segundo informou o 112, foi a propia implicada a que contactou coa central de emerxencias, sobre as 10,15 horas, para alertar de que se caeu ao chan e non conseguía levantarse. Na súa comunicación, sinalaba tamén que estaba soa na vivenda, polo que non podía abrir a porta aos profesionais de emerxencias.
Con esta información, o 112 puxo os feitos en coñecemento do Servizo de Urxencias Sanitarias de Galicia-061, da Policía Nacional, da Policía Local e dos Bombeiros de Vigo.
Xa no lugar, os servizos sanitarios confirmaron a necesidade de empregar material de apertura de portas. Deste xeito, os xestores do 112 procederon a informar os Bombeiros municipais para que se encargasen de facilitar a entrada ao domicilio e que a muller puidese ser atendida.
