Axentes da Policía Nacional da Comisaría de Vigo detiveron a un veciño da parroquia de Beade, como suposto autor dun delito de tráfico de drogas, e ao que lle interviñeron máis de 7 quilos de marihuana e haxix.

Segundo informou a Policía, a investigación iniciouse por mor dunha intervención no domicilio deste home, onde acudiu unha patrulla alertada por unha discusión. Unha vez na vivenda, os axentes observaron no interior diversos feixes e xermolos de marihuana, así como diñeiro en efectivo.

Ante a sospeita de que se estaba cometendo un delito contra a saúde pública, puxeron os feitos en coñecemento da unidade especializada de Comisaría.

No marco da investigación, realizouse un rexistro a fondo da vivenda, e os axentes atoparon 7 quilos de marihuana, 1,845 quilos de xermolo e picado, 380 gramos de haxix, útiles para tratar e envasar as drogas, e diñeiro en efectivo.