Os veciños de Gondomar súmanse un ano máis ao “Proxecto Ríos”. Esta iniciativa, comandanda pola asociación ambiental ADEGA, consiste na limpeza simultánea de ríos de todos os puntos de Galicia; nun acto reivindicativo que pretende poñer en valor a necesidade do coidado do medio ambiente dun xeito activo.
A xornada escollida para o encontro será o vindeiro domingo 27, no que os veciños de distintos municipios das 4 provincias galegas se desprazarán ós ríos da súa contorna para tentar retirar a maior cantidade posible de lixo e refugallo. Os habitantes de Gondomar poñerán o seu gran de area actuando sobre o río Miñor e os seus afluentes.
A xornada, comandada polo Concello dará comezo ás 10:00 da mañá na Ponte das Ánimas. Precisa de inscrición previa, que pode ser realizada escribindo ao correo medioambiente@concellodegondomar.gal, onde deberán deixar o seu nome e apelidos completos e o DNI. Os menores de 18 anos, destacan dende o Concello, deberán ir acompañados por un adulto que se responsabilice deles.
MÁSCARAS CONMEMORATIVAS
A adhesión de Gondomar á xornada marca un ano máis de compromiso coa limpeza dos ríos, logo de que o ano pasado voluntarios do termo municipal recolleran máis de 800 quilogramos de refugallo nos mesmos ríos. O Concello insta a todos os veciños a participar e lembra: os voluntarios e voluntarias recibirán máscaras conmemorativas da xornada, bolsas e luva, así com unha pequena merenda ao remate da actividade.
