Un home, B.M.J.P. de Vigo e 57 anos de idade, foi detido na noite do pasado sábado na cidade olívica tras agredir á súa nai, unha muller de 80 anos que padece alzheimer.

Tal como informou a Policía Local, os feitos ocorreron pasadas as 22,30 horas, cando a irmá do agora detido alertou aos axentes despois de que o home agredira á nai de ambos na súa casa, situada no camiño Meixoeiro.

Unha vez no lugar, a muller explicou aos actuantes que o seu irmán losqueara á anciá. Ademais, ao recriminarlle dita acción, ela tamén recibira como resposta un forte empuxón, momento no cal chamou á Policía. Por todo iso, o home foi detido como presunto autor dun delito de violencia no ámbito familiar, mostrando unha “forte resistencia activa”, braceando e tratando de agredir aos funcionarios.