A Garda Civil denunciou un veciño de Mos, de 30 anos de idade, como autor dunha infracción por condución temeraria, tras difundirse un vídeo por redes sociais no que se lle ve accedendo a unha rotonda a gran velocidade, de forma temeraria e derrapando.

Segundo informaron fontes do Instituto Armado, axentes do subsector de Tráfico tiveron coñecemento dese vídeo o pasado 19 de setembro. Nas imaxes vese un BMW de cor azul, que accede a unha rotonda en Mos a unha velocidade inadecuada, dando un xiro completo á mesma e derrapando.

Os investigadores iniciaron as xestións para identificar o condutor autor desa manobra, que se produciu na tarde do sábado 17 de setembro, no quilómetro 155,700 da N-550 en Mos.

O pasado 21 de setembro, a Garda Civil localizou o propietario do coche, que recoñeceu que era quen conducía o día da infracción, polo que se lle formulou denuncia administrativa por condución temeraria. Esta infracción supón unha sanción de 500 euros e a perda de 6 puntos do permiso de conducir.